Батыс өңірі Алаш қайраткерлерінің рухани мұрасы және оның қазіргі замандағы маңызы

Аңдатпа

Бұл мақалада Халел Досмұхамедовтың қазақ халқының рухани және мәдени дамуына қосқан үлесі талданады. Ғалымның тіл тазалығы, жат сөздерді бейімдеу, ұлттық білім беру жүйесін қалыптастыру және медициналық ағартушылық салаларындағы еңбектері қарастырылады. Сонымен қатар, орыс мектептерінде оқыған қазақ балаларының ана тіліне қатысты мәселелері оның салдары туралы ғалымның тұжырымдары талданған. Мақалада Батыс өңірі Алаш қайраткерлерінің ұлттық сана мен тәуелсіздік идеяларын нығайтудағы рөлі мен олардың қазақ қоғамының рухани деңгейін көтеруге бағытталған қызметтері сипатталады. Халел Досмұхамедовтың жат сөздерді қабылдау мен бейімдеу принциптерін, ана тілін оқытудың маңыздылығын, сондай-ақ ұлттық тәрбие мен мәдениетті дамытуды рухани жаңғырудың негізі ретінде қарастырған көзқарастарына тоқталады. Батыс өңірі Алаш қайраткерлерінің мұрасы қазақ халқының ұлттық бірегейлігін сақтауға, әділет пен бірлік идеяларын қалыптастыруға және ұрпақтың рухани санасын дамытуға үлес қосатын баға жетпес құндылық ретінде бағаланады. Халел Досмұхамедовтың ғылыми жаңалықтары мен практикалық ұсыныстары қазақ қоғамының қазіргі тіл саясаты мен мәдени дамуына ықпал ете алады. Мақала Халел Досмұхамедовтың идеяларының қазіргі қазақ қоғамы үшін өзектілігін айқындауды мақсат етеді.